Ашшĕ-амăшне кура ырра хăнăхаççĕ

Çак кунсенче Чăваш Енре «Çемье çулталăкĕ - 2021» конкурса пĕтĕмлетрĕç. Чилайăх çемьесене Чăваш Республикин Пуçлăхĕ Олег Николаев тата унăн мăшăрĕ, республикăри Хĕрарăмсен Канашĕн председателĕ Наталья Николаева чысларĕç.

«Чи малтанах «Çемье çулталăкĕ» конкурса йĕркелесе ирттерекенсене тата унта хутшăнакансене, çемье, пысăк çемье хаклăхне палăртса упраса пынăшăн чĕреренех тав тăватăп. Çемье – обществăн пĕр пĕчĕк ушкăнĕ. Шăп та шай халăх йăли-йĕркине упракан çемье вăйлă патшалăхăн çирĕплĕх пали шутланать. Çирĕп çемьесем пурăнакан патшалăха тулашри тата шалти хăрушлăх та, кризиссем  те, ытти чăрмавсем те шиклентермеççĕ», - пухăннисене саламланă май палăртрĕ регион ертÿçи. 

Район чысне асăннă конкурсра кăçал Элĕк салинче пурăнакан Иванпа Лилия Никифоровсем хÿтĕленĕччĕ. Вĕсем асăннă конкурсăн районти тапхăрне хутшăнса çĕнтерÿçĕсем ята тивĕçнĕччĕ. Республика шайĕнче вĕсене Свидетельство парса чысларĕç.

Çавăн пекех çак конкурса Элĕк районĕнчен Изванка ялĕнчи Алексейпа Татьяна Гордеевсен çемйи те хутшăнчĕ. Волонтерсен çемйи «Çулталăк çемйи - 2021» мероприятире хăйсен ĕçĕ-хĕлĕпе паллаштаракан, ал ĕçĕсен куравне те хатĕрлерĕç. Пултаруллă та хастар çемьене Чăваш Республикин Ĕç тата социаллă хÿтлĕх министрĕ Алена Елизарова Чăваш Ен ПуçлăхĕнТав хучĕпе чысларĕ.

Çакна та палăртса хăвармалла, 18 çул ытла ĕнтĕ Чăваш Республикинче ĕç ди- настийĕсене те хисеп тăваççĕ. Çÿлерех асăннă мероприятире те ку хутĕнче пилĕк ĕç династине чысларĕç. Вĕсен йышĕнче педагогсен, тухтăрсен, культура, ял хуçалăх ĕçченĕсемпе промышленноçра тăрăшакансен династийĕсем пулчĕç.

 Светлана ВАСИЛЬЕВА,

район администрацийĕн çамрăксемпе ĕçлекен специалисчĕ.