Сентябрĕн 19-мĕшĕнче ирхине 9 сехетре Элĕк ен пенсионерĕсем çула тухрăмăр. Пирĕн тĕллев - Санкт-Петербурга çитмелле. Тепĕр кунне ирхи 7 сехетре унта пултăмăр та. Ентешсем пире ăшшăн кĕтсе илчĕç. Хăна çуртĕнче вырăн та хатĕрленĕ. Вырнаçнă хыççăн пĕр тăхтамасăр чаплă кĕперсем айĕн тухрăмăр, шывсем, канавсем тăрăх экскурсинче пултăмăр. Пĕтĕмпе 21 кĕперпе паллашрăмăр. Хыççăн Петĕр патша палăкне çитсе куртăмăр. Каçхине вара Халăхсен туслăх çуртĕнче Петербург чăвашĕсемпе тĕл пултăмăр. Кунтан эпир пĕчĕк парнесем илсе кайнăччĕ. Вĕсене чăваш музейĕ валли хăвартăмăр. Ентешсен «Юрату» халăх фольклор ушкăнĕ пĕчĕк концерт кăтартрĕ. Чейпе хăналарĕç. Тĕлпулу каçĕ кăмăллă та савăнăçлă иртрĕ.

Сентябрĕн 21-мĕшĕнче ирхине Ксения Петербуржская ячĕпе лартнă часавайра пулса çурта лартрăмăр. Хыççăн «Невский пятачок» музейра пулса тĕлĕнтĕмĕр. Кунта вăрçа каякан çынсен чăн-чăн сăнĕсене кăтартнă. Унтан тухсан «Слава защитникам Ленинграда» диарамăна кĕрсе куртăмăр. Çав «Невский пятачок» тăшмана самай тытса чарнине пĕлтĕмĕр. Каçхине вара сумлă хулан пилĕк кĕперне уçнине курса килентĕмĕр. Сентябрĕн 22-мĕшĕнче хулапа тĕплĕнрех паллашрăмăр. Петропавловски крепоçне çитрĕмĕр. Унта та тĕлĕнмелли пайтах пулчĕ. Пĕлменни, курманни, тĕлĕнмелли ума чылай тухрĕ. Хамăр ентешĕн Петр Егорович Егоров архитекторăн «Çуллахи садăн карти» ĕçĕ тĕнче пĕлтерĕшлĕ. Унта та çитсе куртăмăр. Чи тĕлĕнмелли тата ĕмĕрлĕхех асра юлмалли вара Эрмитажа çитсе курни пулчĕ. Ун хитрелĕхне, пахалăхне курса «хытсах» тăтăмăр. Калаçайми пулса та лартăмăр тейĕн. Пĕрремĕш хутра - аваллăх тĕнчи, Египетăн, Евразин палăкĕсем упранаççĕ, çап-çутă, ылтăн тĕслĕ курăнаççĕ. Иккĕмĕш хутра вырăс культурине, авалхи Руçе халалланă экспонатсем вырнаçнă, çавăн пекех нумай çĕршывăн историне халалланă керменсен шалти пайĕ илемĕпе тыткăнлаççĕ. Виççĕмĕш хутра Иран çĕршывăн культурипе ÿнерĕ тата ытти те куçа илĕртрĕç. Сентябрĕн 23-мĕшĕнче Петергофа çитсе лекрĕмĕр. Кунта керменсемпе парксен комплексĕнче курса çÿрерĕмĕр. Тăван ене таврăнас умĕн Иван Яковлев ячĕллĕ Санкт-Петербургри чăваш наципе культура автономине йĕркелесе яракансенчен пĕрин, хамăр ентешĕн çарпа тинĕс наукисен кандидачĕн, Чăваш Республикин тава тивĕçлĕ культура ĕçченĕн Виталий Золотовăн вил тăпри çине кĕрсе тухрăмăр, чечексем хутăмăр, пĕр минут шăп тăтăмăр.

Çул çÿреве пĕтĕмлетнĕ май çакна калас килет, пирĕншĕн Санкт-Петербургри чăваш наципе культура автономийĕн ертÿçи, Вăрмар районĕн çынни Валериан Гаврилов çывăх тăван пекех пулчĕ. Вăл çул çÿреве ăнăçлă ирттерме пулăшрĕ.

Любовь КОНСТАНТИНОВА,

районти пенсионерсен Союзĕн председателĕ.

http://alikovopress.ru/pensionersemshen-kurmalli-numaj-pulche.html